I&M Bank visits customers in Rusizi

14th Dec 2017

I&M Bank yeretse abatuye Rusizi uburyo bakungukira ku mahirwe y’ubukerarugendo

 

Ubuyobozi bwa I&M Bank bwagaragarije abakiliya bayo n’abandi batuye Akarere ka Rusizi uburyo batera imbere bakoresheje amahirwe bafite cyane cyane ashingiye ku bukerarugendo.

Akarere ka Rusizi ni kamwe mu dufite amahirwe y’ubukerarugendo ashingiye ku ishyamba rya Nyungwe, Ikiyaga cya Kivu, Amashyuza n’ibindi ariko ngo ntabyazwa umusaruro na barwiyemezamirimo bahakorera.

Mu biganiro I&M Bank yagiranye n’abakiriya bayo kuri uyu wa Gatatu tariki ya 13 Ukuboza 2017, Umuyobozi ushinzwe abikorera baciritse muri I&M Bank, Callixte Nyirindekwe, yasobanuye ko mu mwaka utaha mu bikorwa bazibandaho harimo ubukerarugendo n’amahoteli kandi bakaba basanze ari na byo ubuyobozi bw’akarere bushyizemo ingufu.

Ati “Aka karere iyo ukarebye ubona kihariye mu bijyanye n’ubukerarugendo, twahuye n’umuyobozi w’aka karere yatunyuriye muri make imishinga ihari atwereka aho nka banki twabafasha. Urabona ko ibijyanye n’amahoteli n’ubukerarugendo ari urwego rukeneye amafaranga kandi twasobanuye neza ko dufite ingamba muri uyu mwaka utaha yo kwita cyane kuri urwo rwego.”

Abakiliya b’iyi banki banyuzwe na serivisi nziza bahabwa ndetse banishimira n’izindi nshyashya babagejejeho zirimo no gutera inkunga imishinga y’ubukeragundo n’amahoteli.

Umwe ati “Serivisi baduha ni nziza cyane, nta mirongo tuhasanga kandi n’inguzanyo baraziduha; icyo twabasaba ni ugukomeza kuduha serivisi nziza.”

Umuyobozi Mukuru wa I&M Bank mu Rwanda, Robin C. Bairstow, yashimiye abakiliya b’iyi banki anabifuriza kuzagira Noheli nziza n’umwaka mushya muhire wa 2018.

 

Bamwe mu bakiliya ba I&M Bank hamwe n’abayobozi bayo

 

Callixte Nyirindekwe uyobora ishami rishinzwe abakiriya bari mu bucuruzi muri I&M Bank